Tuesday, November 22, 2022

Mga masahista sa Plaza
mihangyo og silonganan

TAGBILARAN CITY, Bohol, Nov 20 (PIA)—Minghangyo ang kahugpungan sa mga masahista ug manikurista sa Plaza Rizal ngadto sa mga hingtundan aron may temporaryo na sila nga kapasilongan samtang nagtrabaho diha sa Plaza.

Didto sa dinungan nga Dagyaw 2022 Open Town Hall Meeting nga gihost sa Bohol naidtong Nobyembre 17, gipasabut sa mga masahista ug manikurista nga naa nakabase sa atubangan sa Cathedral ni San Jose nga may mga maserbisyohan sila nga mga turista nga nagsuroy sa Bohol, apan sanglit wala silay kapasilongan samtang nagtrabaho, maikog sila sa mga customer nga mauwanan ug mainitan.

Ang Dagyaw Town Hall Meetings usa ka panagtapok diin gihatagn og kahigayunan ang mga anaa sa civil society ug mga tinugyanan sa mga programa ug proyekyo sa kagamhanan nga magkasulti sa tuyo nga mapahaum ug mahimong mas epektibo pa ang mga palisiya nga iya sa kagamhanan nga gipatuman, pasabut ni Department of Interior and Local Government Regional Director Leocadio Trovela, atul sa pagtapok didto sa Bohol Tropics Resort.

Matud pa sa ilang president, ang kanhing Administrasyon minghatag kanila og pwesto apan kini, tua didto sa daan nga tugpahanan nga tuyoon gayud og adto, samtang ang ilang kasagarang cutomer, kadtong nga may gipaabut ug nagpalabay lamang sa panahon diha sa plaza.

Gidugang nila nga may napadangat na sila nga suwat-hangyo ngadto sa gobernadora, kabahin sa usa ka tent nga mahipos-hipos aron ilang temporary nga base samtang nagtrabaho.

Didto sa Dagyaw, gihisgutan ang mga programa ug palisiya kabahin sa turismo, ug mingbati ang mga masahista nga kalabut sila sa serbisyo nga gitanyag alang sa mga turista.

Hinuon, wala usab masayud ang mga masahista ug manikurista kon ang gobernador ba o ang mayor sa syudad ang gikinahanglan nag ilang hangyoon.

Si DILG Bohol Provincial Director Jerome Gonzales hinuon mipasalig nga ilang itunol ngadto sa husto nga hingtungdan ang hangyo sa mga masahista. (PIA-7/Bohol)
NANGALAGAD SA TURISTA, Didto sa Dagyaw Open Town Hall Meetings, mipadayag ang mga masahista ug manekurista sa ilang kahasul kay usahay samtang nagserbisyo sa mga turista, mauwanan ug maintan sila kay wala silay kapasilongan. Nangayo sila og tabang nga mahatagan og tent nga mahipos nga usab aron dili sagabal sa plaza samtang ilang magamit kon maut ang tempo. (PIABohol)
DTI nagbukas sa 6-adlaw nga
Holiday market ug Crafts fair

TAGBILARAN CITY, Bohol, Nov 20 (PIA) –Agi og suporta sa mga micro, small ug medium enterprises (MSME) sa Bohol, gibuksan sa Department of Trade and Industry (DTI) ang unom ka adlaw nga Holiday Market and Crafts Fair 2022 didto sa Activity Center sa Island City Mall, Nobyembre 21.

Ang crafts fair nga gi-apilan sa 22 ka mga MSME kang kinsa nga negosyo mao ang paghimo og nga wearables ug homestyling nga mga kagamitan, giapilan usab sa 13 ka mga mamumuhunan nga naghimo og processed food ug 8 ka mga naa mamumuhunan nga anaa sa furniture.

Ang mga gihanyag nga mga display, agi og pagpangandam sa Pasko ug kasagaran niini, adunay tema nga pangpasko, nga gipahaum sa nagasingabut nga kapaskohan.

Matud ni DTI Bohol SME division chief Vierna Teresa Ligan, kining inisyatiba sa ilang buhatan gilauman nga magtabang sa nga MSME nga makabarug og balik gikan sa pagkalup-og sa mga pagsuway nga ming-uyog sa ilang mga pamuhunan.

Si Ligan namulong sa ngalan ni DTI Bohol Provincial Director Maria Soledad Balistoy, kinsa usab mibutyag nga ang ilang kalihukan na-aghat lang usab sa ilang nakita kon giunsa sa mga Bol-anon paggamit ang nga tabang nga gitugyan sa buhatan ngadto kanila nga mga MSMEs.

Sa iyang mensahe nga gibasa ni Ligan, aghat pa sa Provincial Director sa DTI ngadto sa mga MSME nga motikang pa sa labing taas nga ang-ang sa ilang hagdan karon aron ila na nga makab-ot ang ilang mga pangandoy.

Gani matud sa ahensya nga nagduso sa pamuhunan ug patigayon, ila na nga nakita nga mahimo na nga lutason ang mga MSME nga ilang gihuptan karon.

Sa katungod ni Gobernador Aris Aumentado, si provincial Administrator Aster Caberte, kinsa kanhi undersecretary sa DTI, mipasabut nga kini na ang sinugdanan sa mas daku ug mas bongga pa nga coming out party sa mga Bohol MSMEs.

Niini, iyang gipadayag sa DTI nga maghimo na og budget alang sa ilang mga sunod nga kalihukan kay kini tugbangan usab sa Kagamhanang Probinsyal.

Kini tungod ka iyang nakit-an nga samtang ang halos tanan nga mga negosyo apalusno sa pandemya, ang MSME buhi sa online selling.

Niini usab, iyang gisultihan ang DTI nga kanunay himoon ang product development subay sa tourism value chain, aron ang mga panginahanglan sa mga turista nga handumanan nga ilang mabitbit gikan sa Bohol, ila na nga mapalit.

Ato nga ipakayab ang unsay ania kanato sa lalawigan sa Bohol, panaos ni Caberte. (RAHC/PIA_7/Bohol)


ALANG SA MGA GAGMAYNG MAMUMUHUNAN. Gibuksan sa DTI Bohol ang 2022Holiday Market ug Crafts Fair nga una na nga nailhan nga Christmas Bazaar, aron may makapakitaan sa ilang mga bag-ong namugna nga produkto ang mga MSME ug kaabagan sila nga makabakod na gikan sa pagkalup-og dihnag ang ekonomiya gipalukapa sa pandemya. Si Provincial Administrator Aster Caberte ug Mayor Jane Yap giabagan nila ni Bise Gob Vitor Balite ug DTI Bohol SME Division Chief Vierna Teresa Ligan sa pormal nga pagbukas sa exhibit. (RAHC/PIA-7/Bohol)
PANGINABUHIAN SA PRISO. Naapil sa Holiday Market ug Crafts Fair ang mga parol nga hinimo sa mga priso, kinsa kahatagan sa ilang mga panginahanglan kon mahalin ang ilang mga parol. (PIABohol)