Duterte Legacy caravan

gipahigayon sa Loay, Lila

TAGBILARAN CITY, November 8 (PIA)--Gipahigayon ang unang adlaw sa Duterte Legacy Campaign sa lalawigan sa Bohol nga nagdala sa tema nga “Barangayanihan Caravan Towards National Recovery” sa lungsod sa Loay ug Lila Lunes, Nobyembre 8.

Gipangunahan kini sa Presidential Communications Operations Office (PCOO) pinaagi sa Office of the Global Media and Public Affairs (OGMPA) nga nagtinguha sa pagpasundayag sa tinuod nga estorya gikan sa mga benepisyaryo mismo ug maglarawan sa whole-of-nation approach nga pagdumala ug serbisyo publiko ni Presidente Rodrigo Roa Duterte.

Gisalmotan kini sa nagkalain-laing ahensya sa gobyerno nga nagtanyag sa ilang mga serbisyo sama sa Department of Labor and Employment (DOLE), Department of Social Welfare and Development (DSWD), Department of Public Works and Highways (DPWH), Technical Educations and Skills Development Authority (TESDA), Philippine Drug Enforcement Agency (PDEA), Philippine National Police (PNP) ug Bureau of Fire Protection (BFP).

Ang mga benepisyaryo sa nagkalain-laing programa ug serbisyo sa gobyerno gigahinan og oras sa paghatag og mensahe ug testimonya ngadto kang Presidente Duterte atol sa gipahigayong hamubong programa.

Gipahayag ni PCOO Asst. Secretary Jusan Vincent “JV” Arcena nga ang mga programa nga gipatuman sa administrasyong Duterte sa tumong nga mahimong mas haruhay ang pagpanginabuhi sa katawhan, sama sa UniFAST nga libreng pagskwela sa kolehiyo; Build, Build, Build o ang pagtukod sa mga imprastraktura nga gikinahanglan kaayo alang sa paglambo; ang Malasakit Center, nga nag-ayuda sa mga tawo nga anaay panginahanglanon sa pagpanambal; ug uban pa.

“Because of the Build Build Build program, 3.5 kilometers Montaña-San Juan-Buena ventura Road sa Baclayon ang nahimo. Gihimo ang inyong Bohol Capitol Building ug gi-inaugurate ang seven seaport projects worth about P900 million for expansion, rehabilitation, and modernization. Kabilang dyan iyong Port of Maribojoc, Port of Ubay, Tagbilaran, Talibon, Jagna, Tapal and Loon,” matud pa ni Arcena.

Si Loay Mayor Hilario L. Ayuban mipadayag sa iyang pasalamat kang Presidente Duterte sa tanang proyekto nga gihatag sa ilang lungsod.

“The Municipality of Loay is so happy. Mapasalamaton ‘ta kanunay sa atong halangdon nga si Presidente Rodrigo Roa Duterte sa mga proyekto nga kanunay niyang gihatag sa lungsod. Since 2016, several millions have already been poured in sa atong lungsod sa Loay. In behalf of the people of Loay, we would like to express our outmost gratitude to President Duterte,” matud pa ni Ayuban.

Sa iyang bahin, si Lila Mayor Arturo A. Piollo II midayeg sa maayong pagpangulo sa administrasyong Duterte.

“Ang mga proyekto nga natagamtam sa among lungsod sa Lila gikan sa 2016 hangtod karon nakita sa tanang mga tawo diri sa among lungsod ug among nabati kung unsa ka maayo ang pagpadagan sa administrasyon ni Presidente Rodrigo Duterte,” matud pa ni Piollo.

Ang ikaduhang adlaw sa Duterte Legacy Caravan sa Bohol ipahigayon sa lungsod sa Garcia Hernandez ug Jagna sa Martes, Nobyembre 9.

Sa ikatulong adlaw, ipahigayon kini sa mga lungsod sa Ubay, Trinidad ug San Miguel.

Samtang sa katapusang adlaw sa Duterte Legacy Caravan, ipahigayon kini sa mga lungsod sa Tubigon, Panglao ug syudad sa Tagbilaran sa Huwebes, Nobyembre 11, 2021. (ecb/PIA7-Bohol)

Si PCOO Asst. Secretary Jusan Vincent “JV” Arcena inubanan nilang Lila Mayor Arturo Piollo II ug Vice Mayor Regina Salazar atoll sa unang adlaw sa Duterte Legacy Campaign sa lalawigan sa Bohol nga nagdala sa tema nga “Barangayanihan Caravan Towards National Recovery” sa lungsod sa Lila Lunes, Nobyembre 8. (ecb/PIA7-Bohol)