Wala'y karne, chicharon, chorizo 

gikan’s Cebu makasud sa Bohol

TAGBILARAN CITY, Bohol, March 15 (PIA) -- Piskay ug makalaway gyud unta ang kagumkom nga chicharon gikan sa Carcar, apan ayaw gyud pangahas og dala niana pasulod sa Bohol.

Bisan pa og isuksok sa kina-ilawman sa bag, kay may mga K9 sniffing dogs nga naghuwat dire sa mga pantalan, ug andam nga mosimhot aron ikapagawas ang tinagu-an nga illegal nga gipalusot gikan sa Sugbo.

Kini usab kay gipagawas na ni Gobernador Erico Aristotle C. Aumentado ang Executive Order No. 11 series of 2023, nga nagdili sa pagpasulod sa buhi nga baboy, hilaw nga karne, giproseso nga pagkaon gikan sa baboy sama sa chicharon, longganiza, chorizo, lechon, ug bisan na sa pinakaging nga semilyas butakal gikan sa Sugbo paingon sa Bohol.

Ang mandu sa gobernador sa Bohol gipahaum usab sa tumong nga panalipdan ang Bohol aron dili makasulod ang gikaintapan nga African Swine Fever (ASF), usa ka seryoso nga suliran nga mahimong makapapha sa P6 bilyones nga industriya sa pangbabuyan dinhi.

Ang ASF, usa ka viral disease nga makapuo sa mga baboy sa tibuok lalawigan, ug ang kagaw nga kina-ingnan niini, makasakay sa mga karne nga hilaw, buhi nga baboy ug bisan na gani sa giluto ug giproseso nga karne sa baboy.

Matud sa Office of the Provincial veterinarian pinaagi ni Dr Stella Marie Lapiz, moabut sa 46,000 ka mga ginagmay nga mamuhiay og baboy ang mawad-an sa ilang panginabuhi-an kon may bisag usa ka kaso sa ASF nga makasulod sa Bohol.

Kahinumduman nga una na nga gipagawas sa Provincial Government sa Bohol ang Provincial Ordinance No. 2022-011, nga nagpabag-o sa Provincial Ordinance No. 2021-015.

Ang naulahi nagdili na sa pagpasulod sa buhi nga baboy, karne, giproseso nga karne ug mga gipakaging nga semilya sa butakal gikan sa mga lugar nga naay kaso sa ASF.

Kini nga ordinansa usab gisuportahan sa Executive Order No. 45 series of 2022 nga naglatid sa implementing rules regulations kabahin niini.

Sa ordinansa, ang si bisan kinsa nga magdala, maghupot ug magpasulod og bihi nga baboy, karne o giluto nga pagkaon gihan sa karne sa baboy sa bisan unsa nga kadaghanon o kagamayon, gawas nga sakmiton ang illegal nga dala, masilotan sa P1,000 sa unang higayon, P2,500 sa ikaduhang higayon ug P5,000 sa ilatulong higayon lakip na ang pagkapriso sa dili momenos sa 6 ka buwan segun sa kabubot-n sa korte.

Ug samtang ang Central Visayas nagpabiling ASF-free sukad namatikdan ang sakit dinhi sa Pilipinas niadtong 2021 didto sa Luzon, mismo ang Sugbo na ang nagpahibaw nga niadtong Marso 1, sa usa ka executive order, ang Bureau of Animal Industry (BAI) Animal Disease Diagnostic and Reference Laboratory ming kompirmar sa ASF nga manakod gikan sa mga blood samples nga nakuha sa ASF surveillance activities didto sa Carcar City.

Gani, sa pagpaneguro nga dili makasulod ang kontaminado nga karne o giluto nga pagkaon sihan sa karne sa baboy, bisan ang mga sakyanan nga nagkarga og mga kargamento gikan sa Sugbo paingon sa Bohol, taman lang gyud sa pantalan sa Bohol ug dili na makagawas sa pantalan, gawas kon mobalik na sa Sugbo.

Niini, ang consignees sa Bohol mosugat na lamang sa pantalan, dala ang ilang kaugalingong trucks aron balhinan sa mga kargamento.

Ang imported nga karne nga mo-agi sa Sugbo, mahimo man nga mosulod sa Bohol aroan kinahanglan kini nga magpabilin sa ilang selyado nga kahimtang ug maablihan lamang sulod sa mga accredited nga cold storage facilities sa Bohol nga may pagtugot sa National Meat Inspection Services sa dili pa kini ikadeliver sa mga tindahan. (RAHC/PIA7 Bohol)