OWWA, gipahimangnoan ang publiko

batok sa mga scam sa pagpautang

TAGBILARAN CITY, Bohol (PIA)--Gipahimangnoan sa Overseas Workers Welfare Administration (OWWA) ang publiko batok sa mga account nga naggamit sa opisyal nga imahe sa ilang ahensya aron madani sila nga mopaak sa mga scam sa pagpautang.

Sa social media post sa OWWA, daghang screenshots ang gi-share sa Facebook account nga ginganlag Rochelle May Loan nga naggamit sa logo sa OWWA ug mga post bahin niadtong gusto kuno nga makakuha og emergency loan.

Ang nasangpit nga account aduna usab mga post nga nagpamatuod nga adunay mga tawo nga giingong nangutang kaniya.

Matud pa sa OWWA, ang maong asoy walay relasyon kanila, bisan niining mga rehiyonal o sentral nga mga buhatan.

Gi-awhag usab niini ang atong mga katagilungsod nga i-report dayon ang maong mga account sa ilang buhatan pinaagi sa pag-email o kaha sa pagkontak sa ilang mobile no. 0917-580-5720 o landline 8551-6638. (ECB/PIA7-Bohol)

Kusganong gipanghimakak sa Overseas Workers Welfare Administration nga duna silay kalambigitan sa bisan unsang fake accounts online, busa gidasig nila ang mga Filipino nga motaho dayon ug motawag sa ilang buhatan aron malikayan nga mabiktima sa maong matang sa scam. (OWWA)

PCO, socmed companies naghiusa og pwersa sa

pagpakusog sa digital nga depensa batok sa fake news

TAGBILARAN CITY, Bohol (PIA)--Magtinabangay ang Presidential Communications Office (PCO) ug ang higanteng mga kompanya sa social media sa Pilipinas sa pakigbatok sa "misinformation and disinformation."

Gipasiugda ni PCO Undersecretary for Digital Media Services Emerald Ridao sa panagtapok nga gitawag og UniComm 2024 sa Bayleaf Hotel sa Intramuros, Manila ang panginahanglan nga tapuson ang "misinformation and disinformation" sulod sa "digital sphere" batok sa mga programa sa gobyerno ug indibidwal.

“We are starting with our digital defense today because it is very clear to us that misinformation and disinformation campaigns against the government programs, and against the persons within the administration, are increasingly prevalent (Nagsugod kami sa among digital defense karon tungod kay klaro kaayo kanamo nga ang sayop nga impormasyon ug disinformation nga mga kampanya batok sa mga programa sa gobyerno, ug batok sa mga tawo sulod sa administrasyon, nagkadaghan)," sumala ni Ridao.

Sa laing bahin, ang mga opisyal gikan sa Meta, Google, ug TikTok mitambong sa "Tech Talks" nga diskusyon.

Gipaambit nila ang ilang bililhon nga mga panan-aw ug kahanas sa pakigbatok sa sayop nga impormasyon ug disinformation.

Samtang ang Meta public policy associate manager nga si Genixon David nagpahinumdom sa publiko nga huptan nga 'secure' ang ilang mga social media accounts.

Ang Meta mao ang kompanya sa luyo sa Facebook, Instagram, Threads ug WhatsApp.

“As much as possible, let’s make our passwords strong and unique (Kutob sa mahimo, himoon nato nga lig-on ug talagsaon ang atong mga password),” matud pa ni David.

Gipahimangnoan usab niini ang publiko batok sa paggamit sa ilang pangalan, adlaw’ng natawhan, address o uban pang giila nga datos ingon ilang password, ug gipahinumdoman sila nga likayan ang paggamit sa usa ka password sa daghang mga social media account aron malikayan nga makompromiso.

Ang Google head of government affairs nga si Yves Gonzales nitumbok nga ang YouTube wala magtugot sa content nga adunay seryosong risgo sa pagpakatap sa medikal nga impormasyon nga supak sa lokal nga mga awtoridad sa panglawas o mga giya nga gitakda sa World Health Organization.

Matud pa ni Gonzales nga ang misyon sa YouTube mao ang paghatag og tingog sa publiko sa social media ug hatagan sila og “go-to platform” diin sila makakat-on, malingaw ug makamugna og audience pinaagi sa ilang mga channel.

Ang hepe sa TikTok public policy sa Pilipinas ug Malaysia, Toff Rada, nihatag og gibug-aton sa importansya sa pagbaton og kritikal nga panghunahuna ilabi na kung ang mga tiggamit dili makaila o makasulti kung unsa ang husto ug sayop nga content.

Samtang, gituki usab sa komperensya ang mga hagit nga giatubang sa mga ahensya sa gobyerno lakip na ang pag-hack sa account ug pagpakatap sa peke nga balita.

Gihisgutan usab ang mga lakang aron maminusan ang peligro lakip na ang paglikay sa pagkaylap sa pagreport sa mga nakompromiso nga mga account ug pagpasiugda alang sa pag-ugmad sa mga kahanas sa kritikal nga panghunahuna. (ECB/PIA7-Bohol)