DepEd nihangyo sa mga ginikanan nga 

dili tubagon ang modules sa ilang anak 

TAGBILARAN CITY, October 5 (PIA)--Nanawagan ang Department of Education (DepEd) sa mga ginikanan nga dili tubagon ang work sheets sa mga estudyante, apan angay gabayan lamang kini sa pagkat-on. 

Sa gipahigayong online media forum usa ka adlaw sa dili pa magbukas ang klase sa mga pampublikong tunghaan, miingon si DepEd Undersecretary Tonisito Umali nga mahinongdanon ang papel sa mga ginikanan sa bag-ong set-up sa pagtuon apan wala kini nagpasabot nga ilang akuon ang mga himuonon sa bata sa eskwela. 

“Hindi po sila ang dapat sasagot ng pagsusulit o takdang aralin o gawaing pang-upuan ng mga bata. Klaro po 'yan,” matud pa ni Umali. 

Gidugang pa ni Umali nga may gipahigayong panagpulong sa mga ginikanan kun unsaon paggiya sa mga bata sa pagkat-on. 

Giingong adunay sistema usab ang mga eskwelahan aron mahibaw-an kun nasabtan ba sa mga estudyante ang leksyon. 

Si Umali nagkanayon nga ang mahinongdanon, siguruhon lamang sa mga ginikanan nga sa paagi sa paggiya niini makat-on ang mga bata. 

Tungod sa padayon nga hulga sa coronavirus disease (COVID-19), magpatuman ang mga eskwelahan og distance learning diin makat-on ang mga bata gikan sa ilang mga panimalay pinaagi sa modules, online classes, telebisyon ug radyo. (ecb/PIA7-Bohol)