DOLE ug CHED, manghatag og P30K 

cash assistance alang sa mga anak og OFWs 

TAGBILARAN CITY, October 5 (PIA)--Target karon sa Department of Labor and Employment (DOLE) ug Commission on Higher Education (CHED) nga manghatag og cash assistance sa mga anak og overseas Filipino workers (OFWs) nga nawad-an og trabaho o namatay tungod sa coronavirus disease (COVID-19) pandemic. 

Matag magkolehiyong anak sa mga OFWs makadawat og P30,000 isip educational assistance. 

Sa usa ka pahayag, miingon si DOLE Undersecretary Dominique Tutay nga ang nahisgotang one-time financial assistance nahisulod sa Tabang OFW Program sa DOLE ug CHED. 

Matud pa nga may gigahin nga P1 bilyong pondo ang gobyerno alang sa halos 30,000 ka benepisyaryong OFW. 

Giingong plano sa DOLE ug CHED nga sugdan ang pagpanghatag sa educational assistance ning buwan sa Oktubre human makumpleto na ang listahan sa mga kwalipikadong anak sa mga OFW. 

May ipahigayong panagpulong aron susihon og maayo ang himuong listahan aron makita kun mosibo usab kini sa listahan sa Overseas Workers Welfare Administration (OWWA). 

Kinahanglan lamang nga ipakita ang pagmatuod nga ang ilang mga anak naka-enroll o mag-enroll sa CHED-accredited o recognized colleges o university. (ecb/PIA7-Bohol)