Information Officer’s Conference

gipahigayon sa DSWD-7 sa Bohol

TAGBILARAN CITY, Bohol (PIA)--Ang Department of Social Welfare and Development (DSWD) Field Office 7, pinaagi sa ilang Social Marketing Unit (SMU), nagpahigayon og Information Officer’s Conference sa lalawigan sa Bohol niadtong Hunyo 18.

Gi-presentar sa DSWD-7 ang mga nahimo ug nakab-ot sa mga programa ug serbisyo niini, ingon man ang mga update sa mga bag-ong programa sa ahensya, ngadto sa mga information officers sa mga kalungsoran ug national government agencies sa lalawigan nga mga sakop sa Association of United Development Information Officers (AUDIO)-Bohol.

Gitubag ug gihatagan og katin-awan sa mga kawani sa SMU ang mga pangutana sa ilang mga kaubang information officer kalabot sa mga programa ug serbisyo sa departamento nga gipatuman sa Bohol.

Gi-presentar ni KALAHI-CIDSS Program Officer Carl James Ocubillo ang mga bag-ong programa sa ahensya, sama sa Oplan Pag-Abot Program, WALANG GUTOM 2027: Food Provision through Strategic Transfer and Alternative Measures Program (Food STAMP Program), Tara, BASA! Tutoring Program, Program SOLo o Strengthening Opportunities for Lone Parents, ug uban pa.

Ang Pag-Abot Program ug Food Stam Program gisuportahan sa Executive Orders nga giluwatan ni Presidente Ferdinand R. Marcos Jr.

Samtang ubos sa Pantawid Pamilya Pilipino Program (4Ps), ang DSWD magpadayon sa paghatag sa mga interbensyon sa mga mogradwar ug mogawas nga mga benepisyaryo sa 4Ps, kauban ang mga local government units (LGUs), ug mag-monitor sa ilang lebel sa kaayohan aron masiguro nga dili sila mobalik sa kakabos, matud pa ni 4Ps Program Information Officer Kerwin Macopia.

Gi-presentar usab ang Angels in Red Vest, usa ka kampanya nga nagpasiugda sa dedikasyon sa mga mamumuo sa departamento, kinsa andam kanunay sa paghatag og dugang nga gugma ug dugang nga pag-atiman sa mga kabus ug huyang nga sektor sa katilingban sa Pilipinas. (ECB/PIA7-Bohol)

Ang mga miyembro sa Association of United Development Information Officers (AUDIO)-Bohol kauban ang mga kawani sa Social Marketing Unit sa DSWD-7 atol sa Information Officer’s Conference nga gipahigayon sa JJ’s Seafood Village sa syudad sa Tagbilaran niadtong Hunyo 18. (ECB/PIA7-Bohol)