DOLE, nagpahinumdom sa saktong 

pay rules sa EDSA People Power Holiday

TAGBILARAN CITY, February 26 (PIA)--Nagpahinumdom ang Department of Labor and Employment (DOLE) kalabot sa saktong pay rules sa mga employer sa ilang mga empleyado kalabot sa ika-33 nga aibersaryo nga EDSA People Power Revolution niadtong Lunes, Pebrero 25. 

Ang maong anibersaryo gi-deklarar isip special non-working holiday base sa Proclamation No. 555 nga gilagdaan ni Presidente Rodrigo Duterte. 

Base sa gipatuman nga Labor Advisory No. 3, miingon ang DOLE nga kun wala ni trabaho ang empleyado sa maong adlaw, epektibo ang ‘no work, no pay’ principle depende sa polisiya sa kumpanya. 

Alang usab sa mga ni trabaho sa maong special non-working day, angay makadawat ang matag empleyado og dugang 30 porsiyento sa ilang inadlaw nga suholan sa unang walo ka oras nga pagtrabaho. 

Samtang makadawat og dugang 30 porsiyento sa inoras nga suholan o hourly rate ang mga empleyadong ni trabaho og lapas sa walo ka oras. 

Kun natunong usab sa adlaw sa tigpahulay o rest day/day-off sa empleyado ang maong adlaw, bayaran kini og dugang 50 porsiyente sa iyang inadlaw nga suholan. 

Apan kun molapas pa sa walo ka oras ang pagtrabaho sa empleyado, may dugang 30 porsiyento nga hourly rate pa kining angay madawat. (ecb/PIA7-Bohol)