PAHUGYAW SA FOUNDATION DAYS

Labing unang Mayor Rene

Borenaga Cup, gibuksan

TAGBILARAN CITY, Bohol Nov 6 (PIA) –Human sa malampuson nga kadaugan nga nakab-ot sa lungsod sa monglabay nga Governor’s Cup 2023, ug sa tumong nga ugmaron ang kasaligan nga katakus sa kabataan sa natad sa paugnat sa kusog, gilunsad niadtong Nobyembre 4, 2023, Sabado, ang labing unang Mayor's Cup Inter-Barangay Basketball and Volleyball (Men) Tournament 2023 didto sa Bien Unido.

Gipasiugdahan sa lokal nga pangagamhanan sa lungsod, ang First Mayor Rene Borenaga Cup sa Bien Unido, gisalmotan sa 16 ka basketball teams ug 10 ka volleyball team, ug dato duwaon sa sulod sa Atty Felix Garcia Memorial Gymnasium sa lungsod, taho pa sa Information Officer nga si Manuelito Item.

Kahinumduman nga ang Bien Unido nakaabut sa pagpakigtigi sa ikatulo nga pwesto sa Basketball Seniors Men sa milabay nga Governor’s Cup 2023, ug sa kadaugan, naaghat ang mga local nga opisyales nga paluyohan ang dugang pag-ugmad sa paugnat sa kusog dala sa napakita nga abilidad sa mga taga lungsod.

Niadtong Sabado, ang kalihokan gisugdan sa usa ka parada, nga nagsugod sa may alas 9 sa buntag, ug usa ka hamubong programa diin ang mihimo sa pag-abi-abi nga pulong si Hon. Atty. Leonardo Querubin Jr., konsehal sa Sangguniang Bayan.

Si Mayor Borenaga, kinsa mihimo sa inspirational message ug isip inahan sa lungsod, midayeg sa mga mingsalmot sa way pusa nga pagpakita sa abilidad ug kamaayo nga iya sa mga taga Bien Unido.

Niana usab nga adlaw gihimo dayun ag unang hugna sa duwa sa maong torneyo diin ang team sa mga islang barangay sa Maomawan nagkigbatok sa team Sagasa, ug kini gisundan sa panagtigi sa laing mga islang barangay nga mao ang barangay Malingin ug barangay Bilangbilangan Diot.

Sa ikatulo ug katapusang duwa nianang adlawa gihimo sa team Hingotanan West ug team Nueva Estrella, sa mainland Bine Unido.

Ang maong torneyo tipik usa sa pagpangadam sa mga pahugyaw alang sa umaabot nga anibersaryo sa lungsod ug sa tinuig nga kapistahan sa balaang bata nga si Senior Sto. Niño nga maoy santos nga patron sa sa parokya. (PIABohol with /MAI MPIO)