PBBM, gimando ang ‘streamlined permitting process’

sa mga infra flagship projects sa nasud

MANILA (PIA)--Gimando si Presidente Ferdinand R. Marcos Jr., ang pagpahapsay sa proseso sa permit alang sa mga infrastructure flagship projects (IFPs) nga gitumong sa pagpadali sa pagpatuman niini.

Partikular nga gitumbok sa Presidente mao ang gipahapsay nga mga kinahanglanon alang sa mga IFP ug ang pagpayano ug pagpahapsay nga proseso.

Sa gipagawas nga upat ka pahina nga Executive Order No. 59 nga gilagdaan ni Executive Secretary Lucas P. Bersamin niadtong Abril 30, 2024, gipasiugda ni Presidente Marcos ang panginahanglan sa pagpalapad ug pag-update sa imprastraktura sa nasud aron makab-ot ang mahinungdanong pagbag-o sa ekonomiya.

Matud pa niini nga aduna nay 185 ka IFPs nga giaprobahan sa National Economic and Development Authority (NEDA).

“There is a need to further streamline the process for issuance of required licenses, clearances, permits, certifications or authorizations to expedite the implementation of IFPs, consistent with RA 9485, as amended (Adunay panginahanglan sa dugang nga pagpahapsay sa proseso alang sa pag-isyu sa gikinahanglan nga mga lisensya, clearance, permit, sertipikasyon o pagtugot aron mapadali ang pagpatuman sa IFPs, nga nahiuyon sa RA 9485, ingon nga giusab)," si Presidente Marcos miingon.

Ang Presidente nagkanayon nga ang EO 59 magamit sa tanang ahensya sa nasudnong gobyerno, apil na ang government-owned o controlled corporations ug uban pang government instrumentalities, local government units (LGUs) nga nalambigit sa pag-isyu og lisensya, clearances, permits, certifications o authorizations nga gikinahanglan alang sa aprobadong listahan sa mga IFP.

Ang kopya sa EO 59 anaa sa Opisyal nga Gazette nga nag-ingon sa ubang mga clause sama sa mga proseso alang sa online ug/o elektronik nga pagsumite ug pagdawat, dungan nga pagproseso sa mga aplikasyon, bayad sa digital nga pagbayad, ug aksyon sa aplikasyon.

Ang EO mo-epekto dayon sa dihang mamantala sa Official Gazette, o sa usa ka mantalaan nga adunay kinatibuk-ang sirkulasyon. (ECB/PIA7-Bohol)