Disaster workers Resilience Run, Unity

Ride aron hangyo-on ang ‘Hazard pay’

TAGBILARAN CITY, Bohol, July 11 (PIA)—Agi og pag dramatize sa ilang hangyo nga hatagan sila og hazard pay, ang Bohol Association of Local Disaster and Risk Reduction Management Officers (BALDRREMO) maghimo sa Resilience Run ug Unity Ride, karong Lunes, Hulyo 15.

Matud ni Provincial Disaster and Risk Reduction Management Officer nga si Dr Anthony Damalerio, sugdan sa alas 5:00 sa buntag ang ilang adbokasya aron ipadangat ang ilang hangyo ngadto sa mga kadagkuan sa nasud, sa ilang pangandoy nga sila usab, sama sa mga health workers nga nagpulaw usab, kahatagan usab sa igo nga ganti sa ilang pagtrabaho sa tanang oras sa tanang adlaw.

Ang Resilience Run, apilan sa mga sakop sa LDRRMS sa mga kalungsuran ug mga pribadong kompanya nga may pagbansay sa ilang mga tawo sa pagpugong ug pagpakunhod sa epekto sa mga katalagman, matud ni Dr Damalerio.

Milaum usab si Damalerio nga ang mga LDRRMOs sa kalungsuran, magdala na usab sa ilang mga position papers aron hiusahon na sa Bohol ang hangyo alang sa mas lanug nga panawagan.

“Kung ang health personnel adunay hazard pay, angay pod tingali nga may hazard pay ang mga disaster workers,” dayag sa hepe sa Tarsier 117 ang premier disaster and medical rescue arm sa PDRRMC.

Sama sa nga health workers, ang mga disaster workers walay apil sa pagpahuway sa mga holidays, ug walay kahigayunan nga makapahuway sa mga gusto nilang oras nga ipahuway.

Sa panahon sa mga katalagman, manguna ang mga disaster officers sa paggawas aron sutaon ang kahimtang, itala ang mga kadaut, magluwas sa mga nabiktima nga samaran, maghipos sa mga nakalas ug magplano alang sa pagpahiuli sa mga lugar nga nalumpag sa katalagman.

Una na nga gipadayag sa hepe sa PDRRM nga naduso na sa Kongreso ang sugyot sa mga LDRRMOs nga mangayo og hazard pay, ug karon, tumong nila nga maganoy na usab ang Senado, aron matinuod na ang ilang gihangyo.

Ug agi og pagpakusog pa sa ilang hangyo, iparada sa mga LDRRMOs ang ilang mga Rescue Vehicles ug disaster reaction assets libot sa Bohol alang sa ilang unity Ride, sa sama nga adlaw. (PIABohol)

HAZARD PAY. Sa mga oras nga sila nagpulaw, nagpahimutang sa ilang kinabuhi atubangan sa kakuyaw ug sa pagpusta sa kinabuhi aron makaluwas sa uban, dyutay nga hangyo alangs a hazard pay ang gipangayo s amga disaster officers ug kuyogan kini sa PDRRM uban ni Anthony Damalerio. (PIABohol)