Sandugo OTOP Trade Expo

‘24 Sa ICM sa Hunyo 17-22

TAGBILARAN CITY, Bohol July 11 (PIA)—Nangandam na usab ang Department of Trade and Industry (DTI) sa Rehoyon 7 ilabi na ang DTI Bohol alang sa lain na usab nga hukad sa Sandugo One Town One Product (OTOP) Trade Expo, nga magbukas sa Activity Center sa Island City Mall sa Hulyo 17-22, 2024.

Ang Sandugo OTOP Trade Expo, mao ang usa sa mga labing gikahinaman ug gipaabut nga tinuig nga pasundayag sa mga labing bag-o ug labing innovative nga mga produkto nga mugna sa mga Bol-anon nga entreprenuers kinsa minggamit sa mga sangkap nga gikan sa mga kahinguhaan sa Bohol.

Kini aron makamugna sila og mga butang pangdayan-dayan ug gamit sa panimalay, accents sa mga buhatan ug sa mga hotels, resorts ug restaurants, matud ni DTI Bohol Provincial Director Vierna Teresa Chiu-Ligan.

Ang Sandugo OTOP Trade Expo sulod sa 19 na ka tuig, wala pa mapakyas sa pagtanyag sa mga bag-ong designs nga giilogan, gikan sa ilang mga bansaybansay sa design ug crafts workshops nga giapilan sa mga producers.

Ug sa 19 na ka tuig, ang Sandugo OTOP Trade Expo, kini nagpatapok nganhi sa Bohol sa daghan nga mga buyers nga local ug international.

Kini usab ang rason ngano nga kini gidugok usab sa pag-apil sa mga nagkadaiyang exhibitors sa lukop nasud, nga nagdala sa ilang nga produkto ug nagsuporta usab sa mga gagmay nga mamumuhunan.

Ang Trade Expo molanat gikan sa Julyo 17 ngadto na sa Bohol Day, Hulyo 22, ug magtanyag usab sa mga Bol-anon nga Makita ang mga himalitan nga souvenir items, gift ideas, toys, home wares, fashion accessories, processed food, wellness products ug furniture.

Ang DTI, nagasuporta usab sa mga local nga producers pinaagi sa paghatag sa mga teknikal nga tabang sa pamuhunan, paghimo og giugmad nga design ug mga pagtandi sa mga mamalitay, ug ang Sandugo OTOP Trade Expo usa sa mga bantawan alang sa mga produktong Bol-anon nga namugna niining mga bansaybansay, saysay ni Ligan.

Gawas niini, ang DTI nagtukod usab og mga Shared Service Facilities nga mahimong sawhan ang gamit sa mga producers, aron makahimo sila sa mga designs nga ilang nahunahunaan, gamit ang mga teknolohiya nga anaa sa mga SSF.

Gawas sa mga produktong Bol-anon, gipaabut usab nga modagsang dinhi ang mga nag-unang produkto gikan sa mga MSMEs sa mga silingan nga rehiyon nga nangandoy nga makapamaligya sa ilang mga produkto sa mga mamalitay nga nasuki na sa Sandugo OTOP Trade Expo. (PIABohol)

CALAMAY SA LATA. Usa sa mga nakit-an nga produktong gikapakita sa Sandugo Trade Expo sa miaging tuig mao ang calamay nga anaa sa sulod sa lata. Ang Calamay mas dali madaut kon ang sudlanan niini dili limpyo, u gang silaw sa hayag makapamubo usab sa kinabuhi sa palaman sa pan, mao nga ang lata usa sa mga solusyon sa pagpataas sa kinabuhi niini aron mas dugayng mapan-os. (PIABohol)